Бидний мэдэх “хар өдөр”-өөр МАХН-ын төв байр шатаж дахин ашиглагдахгүй болсноор МАХН-ын шинэ байрны зураг, төслийн уралдаанд 15 давхар эсхиз шалгарч “Тусгаар тогтнолын ордон” хэмээн нэрлэхээр болсон. Уг барилга үзэгдэх орчиндоо есөн давхар байх бөгөөд газар доорх хоёр давхарт нь спорт заал, хурлын их, бага танхим, намын түүхийн музей байгуулахаар төлөвлөжээ.
МАХН-ын сүндэрлэж буй ордон  АН-ын шарыг хөдөлгөж 20 жилийн ойгоороо 20 давхар ордон барих хандивын аяны хайрцгийг өөрийн байрандаа байрлуулж одоогийн байдлаар 80 сая төгрөг цуглаад байна. АН-ын шинээр баригдах байр “Ардчиллын өргөө-Ард түмний өргөө” гэсэн нэртэй ба намын байрнаас гадна аж ахуйн нэгжид түрээслүүлэх, ард түмэнд зориулсан үйлчилгээний цогцолбор гэсэн гурван хэсэгтэй. Мөн доод талын зургаан давхрыг ард түмний мэдэлд байлгана хэмээн урьдчилан товлоод байна.
Аль аль намын ордон ашиглалтад орох болоогүй ч шинэ өргөөний давхрууд хэзээний эзнээ олжээ.  АН-ын өргөөнд “Цагаан шонхор”-ын Т.Энхтайван зэрэг бизнесмэнүүдийн нэр гарч байгаа бол МАХН-ын өргөөнд намын нөлөө бүхий эрхэмүүдийн үр хүүхэд, ах дүү хамаатан садан нь түрээслэх гэрээ байгуулахаар болжээ.