МАХН-ын залуус намын даргынхаа тэргүүлж буй танхимыг "эвдэх" тактик боловсруулсан байна-

С.Баярын тодорхойлсончлон стандарт бус хамтарсан Засгийн газрыг дэнжигнүүлэх их хөдөлгөөн улс төрийн хүрээнд өрнөж эхэллээ. Хүчтэй сөрөг хүчингүй засаглалын авторыг ирэх сард Америкаас ирэхэд улстөрчид чамин "бэлэг"-тэй угтахаар сав, баглааг нь хэдийн зэхжээ. УИХ дахь МАХН-ын 26 гишүүн уг нь С.Баярт хаягласан "захидал"-аа өнгөрсөн намар хүргүүлэх гэж байсан.

Гэвч шийрэгнэсээр байгаад "С.Батболдод" хэмээн буруу хаяглаж, "Улс төрийн нөхцөл ээдрээтэй болох нь байна шүү" гэдгийг давхар анхааруулсан билээ. Эзнээ олоогүй эл "захидал"-ыг УИХ-ын гишүүн Н.Ганбямба, Ж.Сүхбаатар нар өнгөрсөн долоо хоногт МАХН-ын дарга, Ерөнхий сайд С.Батболдод гардуулсан.

"Элсний 13", МАХН дахь "Уламжлал, шинэчлэл Ардчилал, шударга ёс" жигүүрийнхэн шаардлага нэртэй сануулгаа С.Баярт гардуулах ёстой байсан ч хэт хашир загнаж, намын Бага хурлын XI хуралдаантай золгосон. Харамсалтай нь С.Баяр намын даргын албаа өгч, тэдний шаардлага ач холбогдлоо алдахад хүрсэн ч С.Бямбацогт, Ж.Сүхбаатар, Ж.Энхбаяр нар уг санаачилгыг ажил хэрэг болгоход бусдыгаа нэлээд ятгасан дуулдана. Тэд энд, тэндэхийн viр өрөөнүүдэд энэ тухай сэм ярихдаа "Бидний үе ирсэн.

Ер нь 1950-1960-аад оныхон яадаг юм бэ. Тэд авдгаа авч, хашдагаа хашиж ханачихсан хүмүүс. Шинэчлэлийн автороор тодорцгоон намын даргад шаардлага хүргүүлэн имижээ өргөж, улс төрд ноёрхлоо тогтооцгооё" тэнцсэн аж. УИХ дахь МАХН-ын бүлэгт тэрслүү 26 олонх болох нь тодорхой. Тиймээс давуу талаа ашиглаж, хамтарсан Засгийн газраас хувь хүртэх санаачилгыг залуучуудын фракци сэдсэн нь энэ. С.Батболдын танхимд 1970-аад оны үеийн хоёр залуу сайд бий.

Эрдэс баялаг, эрчим хүчний сайд Д.Зоригт, Гадаад харилцааны сайд Г.Занданшатар. Хамтарсан Засгийн газрын тэргүүн ийм сонголт хийсэн нь МАХН-ын залуусын амбицийг ихээхэн хөдөлгөжээ. Залуучуудын фракци намынхаа даргын тэргүүлж буй Засгийн газраас хэн, хэнийг золигт гаргах вэ. Ийм нэгэн асуулт эзнээ олж ядан "тэнүүчлэх" болов. Эх сурвалжуудын мэдээлж буйгаар. Нийгмийн хамгаалал, хөдөлмөрийн сайд Т.Ганди, Эрүүл мэндийн сайд С.Ламбаа нарыг огцруулах марафон өрнөж эхэлжээ.

Т.Гандигийн тухайд, экс Ерөнхийлөгчийн хүн, "Элсний 13"-ын нэг. Экс Ерөнхийлөгч Н.Энхбаярийн улс төрийн тавцан дахь хүч суларсан тул Т.Гандитай манатай байгаа. Тиймээс Нийгмийн хамгаалал, хөдөлмөрийн сайдыг огцорлоо гэхэд тулж, түших хүн цөөн. МАХН, Ардчилсан намынхны хорхойтой араанд зуугдаж, эрхэлж буй алба нь хүн бүрийн шуналыг хөдөлгөж буй нэг хүн бол С.Баярцогт. Гэхдээ өөрийн гэсэн орон зай, хүч, хүрээлэл, бас хамгаалалттай болсон түүнийг унагахад хэцүү. Тиймээс хүний, өөрийн намынхан хүч хавсран байж, түүнийг огцруулах гэж зүтгэх биз.

Тэрслүү 26 ч үүнийг сайтар тооцоолж, түүний эсрэг хөдлөхөөр зэхэж байна. Чухам яаж гэдэг нь ч бараг тодорхой. Тэд УИХ-ын гишүүн Д.Оюунхоролыг Т.Гандигийн суудалд зүтгүүлэх нэрийдлээр олны анхаарлыг саринуулж, С.Баярцогтыг түлхэн унагах бодолтой байна. Эрүүл мэндийн сайд С.Ламбаа ч яах вэ. Гахайн ханиад, "Үдийн цай"-наас сурагчид хордсон асуудал гэхмэтчилэн түүнийг ноолох шалтаг мундахгүй.

Гэсэн хэдий ч мань хүн "Эрүүл мэндийн сайдын албыг над шиг хаших хоншоортой хүн УИХ-д байхгүй" хэмээн мэдэгдсэн нь гишүүдийн "аллерги"-г багагүй хөдөлгөсөн. МАХН-ын тэрслүү 26 гишүүн С.Ламбааг огцруулах асуудал тавилаа гэхэд хүч нэмэх олон хүн чуулганы танхимд байх нь гарцаагүй. Ардчилсан намынхнаас нь ч үүнд идэвхтэй оролцох нь лавтай.

МАХН-ынхан хамтарсан Засгийн газраас "тоосго" сугалах ажлыг ийн эхэлж байгаа бол Ардчилсан намынхны шийд хараахан тодорхойгүй байна. Тус намын дэргэдэх Ардчилсан хүчний холбооны ерөнхийлөгч нар өнөө орой цуглаж, энэ талаар нухацтай хэлэлцэхээр болжээ.

Улс төрийн тойм