Соёлын тэргүүний ажилтан, 2009 оны Монголын нийтийн дууны шилдэг дуучин, “Номин талст” хамтлагийн дуучин Т.Дэлгэрмөрөнг арай хийж нэг юм “Ганц худаг”-т хорьж гэнэ. “Би зүрх сэтгэлээсээ дуулдаг”, “Би эх оронч хүн. Төрийнхөө соёмбыг тархин дээрээ залсан хүн” гэх мэтээр аархах дуртай Т.Дэлгэрмөрөн ажлаа хийж явсан цагдаагийн эрүүл мэндэд халдсан хэргээр шүүхэд дуудагдаад удаж байна. Өмнө нь хар тамхины хэргээр сэжиглэгдэж байгаад ямар ч гэм буруугүй хэмээн ялаас мултарсан. Үүнээсээ өмнө өдгөө дэлхийгээр тойрон аялж буй Амайг зодож, тархийг нь гэмтээсэн. Гэсэн ч тэрбээр тухайн үед Амайг Монголоос явснаар нь далимдуулж байдаг муу үгээр булж, гэмгүй цагаан тагтаа мэт өөрийгөө өмгөөлөөд авсан удаатай.

Мөн “Би өмгөөлөгчөө солино. Шинэ өмгөөлөгч авсан. Хэрэгтэй танилцтал нь шүүх хурлыг хойшлуулж өгөөч” гэдэг хүсэлт гаргаж, өөрийгөө түр амраасан. Дараа нь “Хуучин өмгөөлөгчөө авлаа” гэж бас л шүүх хурлыг хойшлуулсан. Эцэст нь “Бие муу. Босч чадахгүй нь, уучлаарай” гэж хэлээд дахин хугацаа сунгасан.

Ийн Монголын шүүхийг хэрхэн аргалж болохыг үлгэрлэсэн дуучин залууг өнгөрсөн долоо хоногт “Ганц худаг”-т хорьсон байна. Ингэхдээ нийслэлийн шүүхийн шүүгчид ч “Энэ залуугаар шүүхийг доромжлуулахгүй” хэмээн шазуур зууж буй бололтой. Арга ч үгүй биз. Жирийн иргэнийг бараг л долоо хоногийн дотор хорихыг нь хорьж, суллахыг нь сулладаг тэдний хувьд Т.Дэлгэрмөрөнгийн дуулдаг нь чухал биш шүү дээ. Шүүхээр тоглож сурсан Т.Дэлгэрмөрөнд л Монголын шүүх засаглал үйлчилдэггүй юм бол яах гэж ч шүүх байх билээ дээ. Хүн зодож, гэмтээчхээд “Бие муу” хэмээн бултаад байдаг тэрбээр энэ хугацаанд бие даасан тоглолт хийж, цомог гаргаж, сурагчдын дундах уралдаан тэмцээн шүүж хэрэндээ л хөөрхөн бизнес хийгээд амжсан. Халтуур хийх болохоороо эрүүл болдог, хариуцлага хүлээх болохоор өвчтэй гэдэг түүнд оноох ялыг нь оноож, шийтгэх ёстой хуулиар нь шийтгэхгүй бол одоо ч арай хэтэрч байна аа. Бүх хүнд ийм давуу эрх олгож чадахгүйгээс хойш шүүгчид ч ажлаа зүй ёсоор нь хийгээсэй билээ. Танхай дуучны хэр дуулдаг нь чухал бус харин шүүх шударга ажиллах нь манай нийгэмд тустай шүү дээ. Дараагийн пээдгэр Дэлгэрмөрөнг өлгийдөж авахаасаа өмнө Монголын урлаг ч ёс зүйн шалгууртай болох хэрэгтэй биз ээ.

Г.Отгонжаргал