Мэргэжлийн хяналтын ерөнхий газраас өнгөрсөн нэгдүгээр сард Клиникийн нэг, хоёр, гуравдугаар эмнэлэг, Гэмтэл согог судлалын үндэсний төвийн үйл ажиллагаанд санхүү, хөдөлмөр нийгмийн хамгааллын чиглэлээр шалгалт хийсэн. Үүнтэй холбогдуулан уг шалгалтаар өчигдөр тус газрын дэд даргын Зөвлөлийн хурлаар хэлэлцүүлж шийдвэрлэлээ. Шалгалтад хамрагдсан эмнэлгүүд өмнөх шалгалтаар өгөгдсөн үүрэг даалгаврыг бүрэн биелүүлсэн байсныг байцаагчид онцолсон. Гэсэн ч цаашид анхаарч ажиллавал зохих зөрчил, дутагдал байсаар байгааг хурлын үеэр танилцуулсан байна. Тухайлбал, нийт эмнэлэгт түрээсийн орлогыг дутуу төвлөрүүлсэн, бүртгэл тайланд авлагаар тусгаагүй, хандиваар ирсэн эмнэлгийн хэрэгсэл, санхүүгийн программыг данс бүртгэлдээ бичээгүй  байсан аж. Мөн байрны засварын ажил, эмнэлгийн хэрэгслийг гэрээнд заасан өртгөөс илүү үнээр шилжүүлсэн, хувь хүний орлогын албан татварыг тухай бүр суутган төсвийн орлогод оруулаагүй зэрэг зөрчилтэй холбоотой акт, албан шаардлага байсан нь илэрчээ.

Тиймээс дээрх шалгалтыг уг хурлаар хэлэлцэж, эмнэлгийн байгууллагуудад үйл ажиллагаандаа анхаарч ажиллах зөвлөмжийг хүргүүлсэн байна. Мөн төрийн өмчийн эмнэлгийн байгууллагуудын ажиллагсдын цалин хөлс, нэмэгдэл урамшуулын асуудлыг нэг мөр шийдвэрлэх болон Эрүүл мэндийн сайдын тушаалаар зохицуулагдаж буй үйлчилгээний төрлийг эргэж харах талаар ЭМЯ-нд санал хүргүүлэхээр болжээ. Түүнчлэн Эрүүл мэндийн байгууллагуудад өгч байгаа өөрийн орлогын төлөвлөгөөний үндэслэлийг сайжруулах, төсвийг хянахдаа эмнэлгүүдээс тавьж буй бодит зардлыг үндэслэн жил жилийн төсөвт суулгах замаар шийдвэрлэх асуудлыг Сангийн яаманд тавихаар шийдвэрлэсэн байна.

Г.Долгорсүрэн /Нийгмийн толь/