Байгаль орчны сайд Л.Гансүх Дархан-Уул аймаг руу зорчин төрийн сайдын хүчийг үзүүлэхээр очоод АН-ынхаа анхан шатны байгууллагын гишүүдэд шившигтэйгээр хөөгдөөд ирсэн сурагтай. Угаас АН-ынхан хэзээний л дарга цэргээсээ далдирч байгаагүй, давилуун улс. Гэтэл эрхэм сайд тус аймгийн АН-ын удирдлагыг солих гэж хүч сүрийг үзүүлсэн нь чухам л гэдэнг нь хөдөлгөж орхижээ. Тэд төрийн сайдыг эгээтэй л зодчихолгүй хурлын танхимаас хөөж гаргасан бөгөөд "Энэ нэг юм "Ах" намынхантай хамтарсан засагт ажиллаад бүр муу зан сурчихаж. Уг нь "Ах" намынхнаас авах зүйл их бий ч энэ нөхөр хамгийн хэрэггүйг нь сурчихдаг бүтэлгүй эд юм даа" хэмээн явсных нь дараа баахан шоолсон нь тэнүүлч салхиар дамжин явсаар нийслэлд ирснийг сонссоноо уламжиллаа.

Улаанбаатар таймс