Менежментийн хувьчлалаар “Хаан банк”-ны захирлаар томилогдон ирсэн Питер Морроуг ажлаас нь чөлөөлөх гэж байгаа сурагтай. Өөрөө ч энэ тухайгаа ойр дотныхоо хүмүүст, зарим доод албан тушаалын захирлууддаа ярьж эхэлсэн байна.Гадны хөрөнгө оруулалттай арилжааны банкуудаас өнгө зүс сайтай явж байгаа ганц банк нь “Хаан” банк. Үүнийг хэн ч үгүйсгэхгүй. Харин ямар учраас түүнийг ажлаас нь чөлөөлөх гэж байгаа талаар зарим нэг яриа чих дэлсэх болов. Сүүлийн үед тус банкныхан орон нутагт үйлчилгээгээ үзүүлж, малчдаас мал барьцаалан зээл олгох нь ихэссэн.

Энэ нь тухайн үедээ банкинд тааламжтай, хөрөнгө мөнгөний тал дээр сайшаалтай шийдэл хэмээгдэж байсан ч хатуу ширүүн уур амьсгалтай манай улсын цаг агаар банкны зээлийн бодлогод алдагдал авчирсан байна. Малаа барьцаалан зээл авсан малчид төлбөрөө хүүтэй нь эргүүлэн төлөх нь битгий хэл барьцаалсан мал нь зуд турханы улмаас хорогдсоноос банк барьцаагүй болсон. Зарим нэг нь төлбөрийн чадваргүй болоод ирэхээр банк үлдсэн хэдийг нь хураан авлаа ч зах зээлийн үнээр зарж, ашиг олох нь байтугай үндсэн төлбөрт нь ч хүрэхгүй болсон. Нэг ёсондоо эргэн төлөгдөх зээлийн чанар нь эрс муудаж, “Хаан банк” “шаталтанд” орсон гэсэн үг. Ганцхан жишээ л дурьдахад “Хаан банк”-ны өнгөрсөн оны ашиг нь 2008 оныхтой харьцуулахад даруй 50 хувиар буурсан тул банкны хувь нийлүүлэгчид захирал Питер Морроуг халах шийдэлд аль сар гаруйн өмнө хүрсэн гэх юм билээ. Түүгээр ч тогтохгүй түүний оронд хэнийг томилох асуудал ч яригдсан сурагтай. Нэгэнт “Хаан банк”-ийг чиглүүлэгчгүй болсон гэх дүгнэлтэд хүрсэн хувь нийлүүлэгчид дараагийнх нь халааг ч сонгочихоод байгаа гэсэн.

Эх сурвалжийн мэдээлж буйгаар шинэ захирлыг монголоос сонгох гэнэ. Өнөөдөр “Хаан банк”-нд монголын талаас нөлөө бүхий хоёр хүн байдгийн нэг нь “Таван богд”-ын Ц.Баатарсайхан. Түүний нэр шинэ захиралд өрсөлдөх хүмүүсийн дотор явж байгаа гэх нь ч бий. Гэхдээ энэ нь удирдлагын шатанд яригдаж байгаа асуудал учраас одоохондоо шивнээ маягаар мэдээлэгдсэн нь энэ.

Ямартай ч “Хаан банк”-ны эзэн одоогийн захиралтай гэрээгээ сунгахгүй гэсэн учраас Японоос төлөөлөн удирдах зөвлөлийн гишүүн Савада Монголд ирж, энэ жилдээ банкны зөвлөхөөр ажиллах юм байх. Харин энэ талаар тус банкны холбогдох хүмүүсээс тодруулахад “Манай банк алдагдалгүй ажиллаж байна. Малчдаас авах зээлийн чанар буураагүйгээр тогтохгүй эргэн төлөлт ч сайн байгаа. Харин захирлуудын асуудлыг мэдэхгүй ээ. Хөрөнгө оруулагчид болон эздийн хооронд яригдаж байгаа асуудал бол хэлж чадахгүй байна. Гэхдээ өрсөлдөгчдийн гаргасан худал мэдээлэл байхыг үгүйсгэхгүй” гэв

Б.Өлзийдэлгэр /Нийгмийн толь/