Монголын утга зохиол, яруу найргийн ертөнцөд урт үс, гоолиг биетэй, уянгалаг хоолой бүхий нэгэн сайхан бүсгүй байх. Түүний тухай ярихаар хүмүүс 90-ээд оны болор цомын тайзнаас үсээ хоёр салаа сүлжсэн, улаан хацартай, хааяахан нусаа “шур”  хийтэл татан “...миний монголын тэнгэрт өдөлсөн бүргэд бусдын тэнгэрт өдөө цацдаггүй юм...” хэмээн цангинуулж байсан бяцхан Б.Ичинхорлоог өхөөрдөн дурсдаг. Эх оронч эмэгтэй хүн хаана байна гэвэл олон хүн өдгөө алсын америкт суралцаж буй яруу найрагч Б.Ичинхорлоог нэрлэх байх. Тиймдээ ч эрдэмийн мөр хөөн, холыг зорьсон найрагч бүсгүй үе үе ямар үйлийн лайгаар ингэж хүний нутагт эх орноо санан гансарч явна вэ хэмээн өөрөөсөө асуудаг тухай хаа нэгтэйгээс сонсож байсан юмдаг. Тэрээр хувийн блогоо нээн, шинэ уран бүтээлээ нийтэлдэг нь газар, газарт ажиллаж амьдарч, эх орноо санаж яваа олон монголчуудын орох дуртай сайт болсон. Тун саяхан найрагч бүсгүйн хүний нутагт мэндэлсэн “Чинадын гэгээ” номын нээлт АНУ-д суух Монгол улсын элчин сайдын яамны байранд болсон аж. Алдарт найрагчийн уран бүтээлийн нээлтэд америкт ажиллаж амьдардаг олон хүн зочилсон дуулдана билээ.