Төрийн байгуулалтын байнгын хорооны хуралдаан өчигдөр ширүүхэн боллоо. Учир нь ХЗДХ-ийн сайд Ц.Нямдорж, УИХ-ын гишүүн Х.Тэмүүжин нарын хооронд халуухан маргаан өрнөсөн юм. Энэ маргаан АН-ын бүлгийн дарга Ч.Сайханбилэг завсарлага авч байгаагаа мэдэгдсэнээр өндөрлөв.

Байнгын хорооны хуралдаанаар Монгол Улсын Их хурлын тухай хуулийн шинэчилсэн найруулгын төсөл болон УИХ-ын гишүүний эрх зүйн байдлын тухай хуулийн төслийг хэлэлцэх эсэх байв. Энэ төслийг Х.Тэмүүжин нарын 16 гишүүн санаачилсан юм. Хуулийн төсөлд тусгаснаар УИХ-ын дэргэд Хяналтын зөвлөл байгуулагдана. Хяналтын зөвлөл нь УИХ-аас баталж байгаа хуулиудын хэрэгжилтэд хяналт тавих үндсэн үүрэгтэйгээр ажиллана гэж заасан байв. Гэтэл Ц.Нямдорж сайд уг хуулийн төслийг парламентын засаглалыг бусниулсан, бүхнийг хянадаг, цагддаг, шинэ үеийн коминтерни УИХ болж хувирахаар болоод байна хэмээн шүүмжилсэн нь эцэстээ сайд гишүүн хоёр бие биенийгээ гөлөг, нохойгоороо дуудалцахад хүргэсэн юм. Ингээд байнгын хорооны хуралдааны үеэр өрнөсөн маргааныг хүргэе.

ХЗДХ-ийн сайд Ц.Нямдорж:
-УИХ-д мөрдөн шалгах эрх өгвөл дарангуйлагч болж, нийгмийг нугаслах ажилдаа орно. Хэнд ч захирагдахгүй, улстөрийн зорилгоор хүссэнээ заазуурддаг. Зөв заазуурдахгүй өс хонзонгоор түүнийгээ гүйцэтгэдэг тийм байдал руу орвол яах вэ. Хязгааргүй эрх олгох гээд байна. УИХ сул дорой байна гэдэг үгийг Х.Тэмүүжин гишүүн олонтоо ярьж байгаа. Ямар баримтад үндэслэж энэ үгийг хэлээд байгааг ойлгохгүй юм. Чухамдаа бол УИХ хамгийн аюултай байгаа, нэг л мэдэхэд шийдвэр гаргадаг, зогсоох юм байдаггүй. Гэнэт ажлын хэсэг байгуулаад сэлэм эргүүлээд шүүхийг хянадаг, прокурорыг хянадаг. УИХ-ын гишүүний нэрээр Авлигатай тэмцэх газарт бичиг өгөөд ардчилалд аюул тулгаж байгаа шүү, Тэмүүжин гишүүн ээ.

УИХ-ын гишүүн Х.Тэмүүжин:
-Өөрөө бусдыг айлган сүрдүүлдэг болохоор түүн шигээ бодоод байна. Буу, сэлэмтэй хүмүүс чинь таны мэдэлд байгаа байх шүү.

ХЗДХ-ийн сайд Ц.Нямдорж:
-Гөлөг шиг юм УИХ-д орж ирж суучихаад цор цор гээд яах нь вэ.

УИХ-ын гишүүн Х.Тэмүүжин:
-Би гөлөг бол та нас бие гүйцсэн нохой. Тань шиг даруулгагүй том толгойтой сайдыг хянахын тулд УИХ-д ийм эрх мэдэл хэрэгтэй. Бусад улсын парламентад гишүүд нь сайд байдаггүй юм. Германчуудыг хар л даа.

ХЗДХ-ийн сайд Ц.Нямдорж:
-Герман улсад гишүүн нь сайдын алба хашдаггүй гэж хэлэв үү, ингэж донгосдоггүй юм. Германы бүх сайд нар гишүүд байдаг.

/Энэ хоёрын хэрүүлийг гишүүн Ө.Энхтүвшин зогсоох гэсэн боловч хүчирсэнгүй, үргэлжилсээр байв./

УИХ-ын гишүүн Х.Тэмүүжин:
-Хүний эрхийн дэд хорооноос “Долдугаар сарын 1 хүний эрх” сэдвээр сонсгол хийх болж, түүнтэй холбоотой мэдээлэл шаардлагатай болоход холбогдох байгууллагууд өгөхгүй байсан.

ХЗДХ-ийн сайд Ц.Нямдорж:
-Холбоотой бүх мэдээллийг гаргаж өгсөн.

-УИХ-ын гишүүн Х.Тэмүүжин:
-Нээлттэй сонсголд прокуророос хүн ирээгүй, өөрөө зааврыг нь өгсөн биз.

ХЗДХ-ийн сайд Ц.Нямдорж:
-Прокурор нээлттэй сонсголд ирэх ёс байхгүй.

Ийн маргаан өрнүүлсэн УИХ-ын гишүүн Х.Тэмүүжин нарын өргөн барьсан дээрх хуулийн төслийг хуралдаанд оролцогчдын олонх дэмжсэнгүй

Улаанбаатар таймс