Дөнгөж 22-хон настай ч дунд сургуульдаа хоёр анги алгасч, одоо хоёр дахь дээд сургуульдаа сурч буй англи, япон хоёр хэлтэй Монголын хоёр дахь гей мисс Энхриймааг танихгүй хүн бараг л үгүй байх. Хоёрын тоо оролцуулсан дэндүү олон тодотгол хэлчих шиг боллоо. Гэхдээ энэ чухал биш л дээ. Харин түүнийг бидний төсөөлдгөөс илүү ухаантай, чадварлаг залуу юм уу даа л гэж хэлэхийг хүссэн юм. Баргийн бүсгүй хүнд заяадаггүй өндөр гоолиг бие, нэр шиг нь ялдамхан царайтай түүнийг эрчүүд шохоорхох нь олонтаа. Тэр ч бүү хэл шаргал ордонд суудаг нэг эрхэм сексийн санал тавиад зөвшөөрөхгүй болохоор нь түүнийг зодуулж байсан удаатай. Харин Энхриймаа энэ тал дээр хөлдүү гэдгээ хүлээн зөвшөөрдөг. Ганбууш, Анужин нар шиг биеэ үнэлж чадахгүй, тэгээд ч өөрийгөө үнэтэй байлгахыг хүсдэгээ ч илэрхийлж байсан. Хэдий өөрөө байгалийн бус бэлгийн чиг хандлагатай ч монголд албан бус тоогоор ижил хүйстнүүдийн тоо 15 000-д хүрсэнд сэтгэл эмзэглэж явдаг гэх. Б.Галсансүхийн шүлгэнд нугасгүй тэрээр модернист фронтын найрагч. Ямартай ч ардчилсан нийгэмд амьдарч буйн хувьд хэн нэгний хувийн сонирхол, хүсэл сэтгэлд нь үнэлэлт дүгнэлт өгч ад шоо үзэхийг хүссэнгүй. Уншигчиддаа түүний анхны уран бүтээл болох “Хоёр сүнстэн” шүлгийн түүврээс нь хүргэж байна.

Би сэйф.

Түлхүүргүй
Түүнийг нь залгисан /залгиулсан/
Нууцлалгүй
Түүнийг нь мартсан /мартуулсан/.     
Би үнэлэшгүй үнэт

Төмөр бодгаль.

Үүрээр ирсэн зүүд бүхнээ
/Тансаг зүүднүүд…/
Тас түгжсэн,
Би сэйф.

Уурлахаараа би дуугаа хураадаг
Уйлдаг.
Тамд тавьсан пянзны аялгууг
Таалж,
Хэсэг уярдаг.
Хэн нэгэн тэндээс намайг
Дууддаг.

Хаврын тэнгэр
Шороогоор уйлахад
Сэтгэлд нь нүүрлэсэн ган
Зүрх шарав.

Дусал хайр хүлээн бэтгэрэх
Тэр жаахан уруулыг
Чийглэхсэн.
Өнгөрсөн намар адил
Дурсамжийг үлдээсэн
Миний дурлал түүнийг
Улам гандаах биз дээ.
Бүх зүйл цэглэсэн ч
Сэтгэлд тэр л бүлээнээрээ.

Гэр хүйтэн
Хөл хүйтэн
Сэтгэл хүйтэн
Гадаа хүйтэн.
Би ойрдоо тэр чигээрээ хөрөөд,
МУУ ЁР.
Өчигдрөөрөө биеэ ээж
Бүлээцлээ
Маргаашийг өвөртлөөд унтана.

Тэд намайг
“Гоё” үгээр удтал чичилж
Тэгснээрээ таашаал авч
Завьжнийх нь шүлс
Хөөсөрч байна гэнэ
БИ ЧИХГҮЙ, сонсохгүй.

Тэд тэртээ холоос над руу
Дунд хуруугаараа мэндчилж
Ахар бодолдоо оодрон хөхрөлдсөөр
Ам нь хатаж байна гэнэ
БИ НҮДГҮЙ, харахгүй.
Тэд хийснийг минь үгүйсгэвч
Хийж чадахгүйдээ шаралхан
Надаас өө сонсох гэж
Чихээ энд тэнд маань наасан гэнэ
БИ ХЭЛГҮЙ, дуугарахгүй.
Боргосон нохой бүрийн урдаас
Чулуу нүүлгэх
БИ ЗАВГҮЙ, …

Бурхан зарим хүнийг дэндүү их аз жаргалаар шагначихаад
Буцаагаад цаг нь болоогүй байхад хариугаа нэхэх юм.
Бурхан лав хэнд, хэзээ, юу өгснөө тэмдэглэдэггүй
Буцааж авахаа л мэддэг хармын сэтгэлтэн байх.
Нэг хэсэг нь жаргалдаа цатгалдаж
Нөгөө нь зовлондоо живэхийг анзаардаггүй болохоор
Бурхан лав хэтэвчний хэмжээг сонжиж
Буян үйлдсэнээрээ халхавч хийдэг хоёр нүүртэй авлигач байх.
Мөнгөтэй нь бурханы дэргэд тахигдаж
Мөнгөгүй нь бузар мэт чичлэгдэж
Үнэн, худлын дэнс үгүй болсноос харвал
Үнэндээ бурхан гэдэг аргатай саятнуудын “найдвартай түнш”
Аз жаргалын панзчин юм байна.