Холын Америкт багагүй хугацаанд амьдарч бүтээлээ туурвиж байгаа “Emotion” хамтлагийн тухай фэнүүд нь үргэлж сураг ажиг тавьж байдаг нь нууц биш. Тэгтэл тус хамтлагийн вэб сайт саяхан нээлтээ хийгээд амжиж. Олон улсын урлагийн тавцанд хүчээ сорьж буй авьяаслаг охид хамтлагийнхаа нэрийг өөрчилж, “Sweetymotion” хэмээн нэрийдэх болсон гэнэ. Иймээс нээлтээ хийгээд удаагүй байгаа вэб сайтаараа дамжуулан дэлхийн өнцөг булан бүрт ажиллаж амьдарч байгаа монголчууд болон хамтлагийнхаа фэнүүдтэй байнга харилцаатай байхыг зорьж байгаа гэсэн. Үүний зэрэгцээ “Sweetymotion” хамтлагийн фэнүүд нь “Myspase” “Hi5” “Facebook” “Twitter” гэх мэт олон нийтийн харилцааны сайтуудаар холбогдон тэдэнтэй чатлаж, санаа бодлоо солилцож болох боломжтой юм байна. Ийнхүү шинэ нэр, шинэ өнгө төрхтэйгээр уран бүтээлээ үргэлжлүүлэхээр шийдсэн хамтлагийн гишүүд болох Болороо, Сарнай, Сүндэрээ гурав өдөр болгон сайтуудаараа орж фэнүүдийнхээ асуулт, санал хүсэлтэд тодорхой хэмжээгээр хариулт өгч байхаа амласан аж.