Сүүлийн үед манай улсад охид, бүсгүйчүүдийг хил давуулан худалдаалах явдал газар авсан. Үүнтэй зэрэгцээд бага насны хүүхдүүдийг хил давуулан худалдах явдал байгааг үгүйсгэхгүй. Өөрөөр хэлбэл Монгол Улсаас гадаадын иргэд хүүхэд үрчлэн авах явдал юм. Сүүлийн жилүүдэд гадаадын иргэд манай улсаас хүүхэд үрчлэн авах нь ихэссэн. Гадаадын иргэнд Монгол Улсын харьяат хүүхэд үрчлүүлэх асуудлыг олон хууль тогтоомжийн дагуу шийдвэрлэдэг ч зарим нэгэн “но”-той асуудлууд байсаар байна.

Учир нь Нийгэм хамгаалал хөдөлмөрийн яам, Гадаадын иргэн харьяатын асуудал эрхлэх алба нь “нууц” гэдэг нэрийн дор хүүхэд үрчлэлтэй холбоотой дэлгэрэнгүй мэдээллийг өгөхөөс татгалздаг. Монгол улсын гэр бүлийн тухай хуулийн 60 дугаар зүйлд үрчлэлтийн нууцыг мэдэж байгаа албан тушаалтан, бусад этгээд түүнийг хадгалах үүрэгтэй гэж заасан байдаг. Гэхдээ энэ нууцад чухам ямар мэдээлэл хамаарах нь тодорхой биш байгаа юм. Нөхцөл байдал ийм байгаагаас хүүхэд үрчлэн авсан гадаадын иргэд манай улсын хуулийн дагуу хүлээсэн үүргээ хэрхэн биелүүлж байгаа болон НХХЯ, ГИХАЭА, гадаад оронд суугаа ЭСЯ, дипломат төлөөлөгчийн газрууд гадаадад үрчлэгдсэн хүүхдүүдийн талаар хэрхэн хяналт тавьж байгаа болон хүлээсэн үүргээ хэрхэн биелүүлж байгааг дүгнэх боломж муу байгаа явдал.
Түүнчлэн жил тутам олон арван хүүхэд янз бүрийн шалтгаанаар гадаад орнуудад урт богино хугацаагаар зорчиж байна. Гэсэн хэдий ч хэдэн хүүхэд гадагшаа гарч хэд нь буцаж орж ирэв, хэд нь буцаж ирээгүй байна, энэ нь ямар шалтгаантай болохыг хянадаг шалгадаг, анхаарал тавьдаг газар үнэндээ алга.

Хил хамгаалах ерөнхий газраас гаргасан мэдээгээр
2006 онд 26118 хүүхэд хилээр гарснаас 22523 нь буцаж ирсэн. Харин 3595 нь буцаж ирээгүй, 2007 онд 38054 хүүхэд хилээр гарснаас 36545 хүүхэд буцаж ирсэн бол 1509 нь буцаж ирээгүй байна. Хэдийгээр хүүхдүүд гадаад оронд зорчих, суралцах нь тэдний эрхийн асуудал хэдий ч үүний далбаан дор хүүхэд худалдаалагдах гэмт хэрэг явагдаж байхыг үгүйсгэх аргагүй. Эдгээр хүүхдүүд яагаад буцаж ирээгүй болохыг магадалдаг, авч гарсан насанд хүрэгсэдтэй нь зохих хариуцлагыг тооцдог, хянан шалгадаг тогтолцоог бий болгох шаардлагатай байгаа талаар Хүний эрхийн үндэсний комиссынхон хэлж байсан.
Дашрамд дурдахад, 1999-2007 он хүртэл 13 улсад 171, ГИХАЭА байгуулагдсан буюу 2001 оны тавдугаар сараас 2007 оны 11 cap хүртэл 149 гэр бүлд 151 хүүхэд үрчлэгдсэн байна. Энэ тооноос харахад нэг гэр бүл нэгээс олон хүүхэд үрчлэн авсан тохиолдол ч байгаа юм. Үрчлэгдэж байгаа хүүхдүүдийн 80 хувь нь олдмол буюу хаягдсан эцэг эхгүй хүүхдүүд байдаг. Тэднийг хүүхдийн асрамжийн төвөөс өргөж авдаг байна. Мөн үрчлэгдэж байгаа хүүхдүүдийн хувьд 0-4 насныхан голдуу байдаг аж

Монголын мэдээ