"Социологийн боловсрол төв" ТББ-аас орон нутгийн сонгуулийн үр дүнтэй хол­бог­дуулан судалгаа явуулснаа өчигдөр хэвлэлийнхэнд мэ­дээллээ. Судалгааны гол зорилго нь орон нутгийн сон­гуулийг дахин явуулах шаард­лагатай юу, хэрвээ   дахисан тохиолдолд санал өгөгчдийн ирц нэмэгдэх үү гэдэг асуултад хариулт авах аж. Нийслэлийн Баянгол, Баянзүрх, Чингэлтэй, Сүх­баа­тар, Сонгинохайрхан, Хан-Уул дүүргүүдэд хийсэн уг судалгаанд 800 орчим хүн оролцжээ.  Судалгааны дүн­гийн талаар "Социологийн боловсрол төв" ТББ-ын захи­рал М.Батбаатар ярихдаа "Иргэд улс төрөөс залхаж, дахин сонгуульд оролцохгүй байх хандлагатай байгааг судалгааны дүн харуулж байна" гэлээ. 

Иргэдийн дийлэнх нь өм­нөх орон нутгийн сонгуульд ИТХ-д сонгогдож байсан хү­мүү­сийн талаар мэдээлэлгүй байгаа нь энэ судалгаанаас анзаарагдсан.  Тухайлбал нийт оролцогчдын 45 хувь нь өмнөх ИТХ-д байсан хүмүүс юу хийсэн талаар санахгүй байна гэсэн бол 25.6 хувь нь зүгээр л хоосон амлагчдын нэг гэж үзжээ. Түүнчлэн ир­гэд орон нутгийн сонгуульд оролцоогүй шалтгааныг улс төрөөс залхсан, мэдээлэл тааруу байсан,  нэр дэв­шигчид таалагдаагүй,таньдаг хүмүүстээ сонгуулийн үнэм­лэх тараасан,  надад энэ нь огт хамаагүй зүйл гэхчилэн хариулжээ. 

Ерөнхийдөө хүмүүс орон нутгийн сонгуулийг дахин явуулахад  эргэлзэж байгаа юм байна.  Судалгаанд орол­цогч­дын 40 гаруй хувьд нь орон нутгийн сонгуулийг да­хин явуулах шаардлагагүй. Хүмүүсийн ирц улам буурна. Цаг, мөнгө үрсэн дэмий зүйл гэжээ. 

Түүнчлэн  сонгуулийн үр дүнд итгэл алдрах байдал иргэдийн дунд давамгайлж байгаа аж.  Жишээ нь,  өрнө­дийн нийгэмд хүмүүсийн амьжиргаа сайжирч эдийн засгийн хувьд хараат бус болохын хэрээр улс төрөөс үл хамааралтай, өөрөөр хэл­бэл сонгуулийн оролцоо ихээ­хэн буурсан үзүүлэлт байдаг. Гэтэл Монгол иргэ­дийн талаас илүү хувь нь орлого багатай атлаа улс төрөөс дайжиж байгаа нь төрд итгэх итгэл нь суларсны тод жишээ болж байгаа юм.  Нөгөө талаар сонгуулийг явуулах­даа олон нийтийн үйл­чил­гээний цэг, зах төвлөрсөн байгууллагуудын үйл ажил­ла­гааг хаах нь бизнес эрхэлж буй болон үйлчилгээ авч буй иргэдийн дургүйцлийг ихээ­хэн төрүүлдэг. Энэ нь  сон­гууль өгөхөөс татгалзахад хүргэдэг гэж тэд үзэж байна. 

Дээрх судалгаагаар орон нутгийн сонгууль дахин явагд­сан тохиолдолд иргэ­дийн 36.1 хувь нь оролцоно. 34.8 хувь нь орол­цох­гүй, үлдсэн 29 хувь нь тухайн үеийн байдлаас болно гэжээ.  Энэ нь орон нутгийн сон­гуулийг дахин явуулахад ир­гэ­дийн ирц 50 хувьд хүрэхгүй байх вий  гэсэн болгоомж­лолыг  бататгаад байгаа аж. 

Судалгааны төвийнхөн "Цаашид нэн даруй орон нут­гийн сонгуулийн хуулийг өөр­чилж иргэдийн хурал ба зохион байгуулалтыг салгах шаардлагатай. Иргэдийн ху­рал хүмүүст үйл ажиллагаа нь мэдэгддэггүй, өөрсдөө хурлаа зохион байгуулах эрхтэй байдаг нь орон нут­гийн үйл ажиллагааг  цалгар­дуулдаг. Энэ нь иргэдийн бараг тал хувь нь өөрсдөө сонгосон төлөөлөгчдийн та­лаар огт төсөөлөлгүй байгаа  байдлаас харагдаж байна. Орон нутгийн сонгуулийг хуульд зааснаар ирц бүр­дээгүй тохиолдолд 14 хоно­гийн хугацаанд асуудлыг шийдэх ёстой. Хэрэв энэ  асуудал шийдэгдээгүй то­хиол­долд хэн хариуцлага хүлээх талаар бүрхэг, зохи­цуулах заалт журам бай­даггүй" гэж байлаа.

Эх сурвалж:Өдрийн сонин