Ерөнхийлөгчийн гэрийн хаяг дээр таван хүн хуурамчаар бүртгэгджээ.

Орон нутгийн хурлын сон­гууль энэ сарын 12-ны өдөр болж өнгөрсөн. Гэтэл Сүхбаа­тар дүүрэгт сонгуулийн ирц хүрсэн гэж бүртгэгдэж байгаа боловч энэ нь хууль бус болох нь илэрч эхлэв. Сон­гууль дууссаны дараа буюу 22.30 минутын байдлаар са­нал өгсөн сонгогчдын ирц 46.1 хувьтай байж. Нийслэлийн хурлын сонгуулийн хорооны дарга Ц.Болдсайхан 12-ны орой мэдэгдэл хийхдээ Сүх­баатар дүүргийн ирц 46.1 хувьтай гээд сонгуулийг хү­чингүйд тооцох тухай дурдаж байсан билээ. Гэтэл энэ ирц 13-ны өдөр гэнэтхэн 50.4 хувьд хүр­чихэж. Яагаад ирц ингэж өссөнийг баримтаар өгүүлье. Ирцийг албан хүчээр бүр­дүүлэхийн тулд сонгогч­дын нэрсийг өм цөм хасчээ. Бүр тухайн үед дүүргийн сонгуу­лийн хорооноос ирцээ бүр­дүүл гэсэн даалгаврыг утсаар ирүүлсэн болох нь илэрлээ. 

Хууль бус аман энэ даал­гаврыг Сүхбаатар дүүргийн сонгуулийн 20 хэсгийн хо­рооны дарга нар тушаал ав­сан цэрэг шиг гүйцэтгэсэн байна. Ту­хайлбал, Сүхбаатар дүүргийн гуравдугаар хэсгийн хорооны нарийн бичгийн дарга Ё.От­гон­сүрэн "Аравдугаар сарын 12-ны өд­рийн 23 цагийн үед дүүргийн сонгуулийн хороо­ноос ирцээ бүрдүүл гэсэн даалгавар өгс­нийг надад дам­жуулсан. Би хууль зөрчсөн байна, эсрэг саналтай бай­гаагаа хэлсэн. 23.40 минутын үед Сүхбаатар дүүр­гийн сонгуу­лийн хорооны дарга Ж.Дангаа над руу утас­даж ямар ямар хүмүүсийг нэрсийн жагсаал­таас хасаж болох тухай зөв­лө­сөн. Үүний дараа хэсгийн хо­рооны дарга Д.Оюунцэцэг бүх хасал­туу­дыг хийж 13-ны өдөр сонгог­чийн тоог батлах тухай тог­тоолыг гаргасан" гэжээ. Энэ нь хэсгийн хороод дээр ту­хайн үед хуудуутай ажил­лагаа хэр­хэн явагдсаныг батлах нэгэн жишээ. Ийм хуудуутай олон жишээ ба­римт болон үлдсэн нь түрүү­чээсээ илэрч эхлэв. Ирц бүрдүүлэх тухай командыг Сүхбаатар дүүргийнхэн тэр чигээрээ биелүүлсэн нь учир­тай. Тус дүүргийн 20 хэсгийн хороодын бүх дарга нар нь МАХН-ын гишүүн юм байна. Сонгуулийн урьдчилсан дүн­гээр МАХН-ын төлөөлөгчид үнэм­лэхүй ялалт­тай байсан тул ирцийг ямар ч хамаагүй аргаар хү­чээр бүрдүүлэхийг зорьжээ. Энэ нь ч одоо бие­ллээ олж олон нийтэд Сүх­баатар дүүрэг орон нутгийн хурлын сон­гуульд ирц нь хүрсэн мэтээр ойлгогдож байна. Сонгуульд нэг нь ялж нөгөө нь ялагддаг нь хууль. Гэхдээ хуулийн дагуу үйл ажиллагаагаа явуу­лах, сон­гогчдын сонгох эрхийг зөр­чихгүй байх нь үүрэг, хариуц­лага билээ. Сонгуулийн тухай хуулийн 17 дугаар зүйлд "Сон­гогч­дын нэр­сийг гаргасан гомд­лын мөрөөр сонгууль бо­ло­хоос өмнө эсвэл сон­гуу­лийн өдөр нэрийн жаг­саалт­аас хасч болох" заалт бий. Тэгтэл гадаад явсан, шилж­сэн, бай­раа түрээслүүлсэн гэх мэт амьдрал дээр хасаг­дах ёстой сонгогчдыг Сүх­баатар дүүр­гийнхэн цаасан дээр хийс­вэ­­рээр хассан нь баримтаар харагдаж байна. Сүхбаатар дүүргийн сонгуулийн хорооны дарга Ж.Дан­гаа уржигдар сайн дураа­раа огцрох өргөд­лөө өгчээ. Түүний оронд Эрүүл мэндийн дэд сайд асан Удвал томилогджээ. Сон­гууль дуус­саны дараа сонгогч­дынхоо тоог баталсан хууль бус энэ үйлдлийг хуулийн дагуу зөв шийдвэрлэнэ гэдэгт тус дүүр­гийн Ардчилсан на­мын гишүүд болон сонгогчид итгэлтэй байгаа гэдгээ илэр­хийллээ. Ирцийг албан хү­чээр бүрдүүлсэн нь  дүүргийн хэсгийн хорооны дарга нарын үйл ажиллагаатай шууд хол­боотой гэж үзэж байгаа аж.

Дашрамд нэгэн хөгтэй гэ­мээр явдлыг дурдахад Мон­гол Улсын Ерөнхийлөгчийн гэрийн хаяг дээр таван хүнийг бүрт­гэ­чихсэн тууж явсан нь илэрчээ. Манайхан үе үеийн сонгуульд хуурамчаар бүрт­гэгдсэн нэр­сийн жагсаалтыг бүрдүүлэхдээ гарамгай гэгд­дэг ч улсынхаа Ерөн­хий­лөгчийг хүртэл тойр­сонгүй байна шүү. Сүхбаатар дүүр­гийн 11 дүгээр хороололд оршин суух Ерөн­хийлөгчийн албан ёсны хаяг дээр Баа­сангийн Үйтүмэн, Үйтү­мэн­гийн Түмэнжаргал, Үй­тү­мэн­гийн ...нарын таван хүн бүрт­гэгдэж дараа нь хасагджээ. Тэд энэ хаяг дээр урьд нь амь­дарч байгаагүй нь хэ­дийнэ тог­тоогд­жээ.

Эх сурвалж:Өдрийн сонин