Жүжигчин Ирина Алферова Оросын сайхан бүсгүйчүүдийн нэг байж, 70-аад оны секс бэлгэ тэмдэг болж явлаа. Одоо ч гэсэн Иринад дурласан эрчүүд олон бий. “Хавх” нэртэй олон ангит кинонд "экс" нөхөр  Александр Абдуловтай хамтарч тоглосон нь энэ ер бусын эмэгтэйг сонирхох сонирхлыг дэврээж орхив. Яагаад ийм сайхан хос салах болсон юм бол. Иринагийн зүрхийг өөр хэн эзэмдэж чадах вэ?

Охиных нь эцэг гадаад хүн
Ирина Новосибирскт өнгөрүүлсэн залуу насаа дурсахдаа,
-Хөвгүүд миний араас их гүйдэг байсан. Би болзоонд явдаг байсан ч хэнийг ч өөртөө гар хүргүүлдэггүй. Хүмүүжилтэй байж дээ.
Харин Москвад ирээд сайхан бүсгүй маань нэгэн гадаадын иргэнд ухаангүй дурласан аж. Алферовагийн найз нарынх нь ярьснаар хөөрхөн оюутан бүсгүйг эхлээд Орост суугаа Болгарын Элчингийн хүү Иван Жулев сонирхож эхэлсэн байна. Иринад тэр биш, түүний найз, 70-аад онд Москвад томилолтоор ирээд байсан болгар бизнесмэн Бойко Гюров таалагдсан аж. Ирина, Гюров нар бие биедээ анхны харцаар дурласан гэдэг. Боловсон залуу Бойко гэнэн оюутан, ирээдүйн кино одын толгойг хөнгөхөн эргүүлчихэв. Гюровыг нутаг буцах болоход Алферова түүнээс хүүхэдтэй болсноо хэлжээ. Гэвч залуу бизнесмэн гэр бүлийн амьдралд бэлэн бус байв. Харин охиндоо Гюров хэмээх өөрийн овгийг өгөхийг зөвшөөрөв. Иринагийн охин Ксения төрөхөөсөө л энэ овгоор явж иржээ.

Дам яриагаар бол, Ксения олон жилийн турш төрсөн эцэгтэйгээ уулзахаас татгалздаг байж. Харин Александр Абдуловыг аавыгаа хэмээн бодож явдаг байна. Ксения хоёр, гурван жилийн өмнөөс Болгар явахдаа Бойкотой уулзжээ.

Салалт
Ирина Александр Абдуловтай анх "Ленком" театрт танилцжээ.
-Саша Абдуловт анхны харцаар л дурласан. Тэр өдөр би "Ленком" театрт анх удаагаа очсон бөгөөд Саша "Хоакин Мурьетийн од ба үхэл" жүжгийн сургуулилалттай байсан юм. Абдулов хүслийг минь биелүүлж, мөрөөдөл бэлэглэгч байсан. Абдуловын дотны найз жүжигчин Александр Долинскийн хэлснээр Александр Гаврилович царайлаг бүсгүй Алфероваг шууд сонирхож эхэлжээ. Иринаг бяцхан охинтойгоо амьдрах газаргүй байгааг мэдээд Долинскийгээс "Алфероваг танай ээжийн байранд түр амьдруулж болох уу?" хэмээн асуусан байна. Чухам тэр л ганц өрөө, давчуухан байранд алдарт хос анх учирдаг болов. Ирина тэнд бяцхан Ксениятайгаа жил шахам амьдарчээ. Гэтэл нэг өдөр Абдулов нэг санал тавьсан байна.

-Намайг гар дээрээ өргөөд цэцэрлэгийн нөгөө өнцөгт хүрвэл одоо ч хариулж болох юм хэмээн Иринаг хэлэхэд Абдулов түүний хүсэлтийг биелүүлж, Алферова ч гэрлэхийг зөвшөөрчээ.
Александр Гавриловичийн найз нарынх нь дурссанаар тэрбээр Иринагийн охинд төрсөн хүүхэд шигээ ханддаг байжээ. Гэрлэлтээ цуцлуулсны дараа ч Ксюшатай уулзаж, тус дэм болдог байв. Магадгүй, ийм болохоор л шүтэн бишрэгчид нь Ксюшаг Абдуловын төрсөн охин биш гэдэгт итгэдэггүй байсан биз.
Энэ хосын амьдрал гайхалтай байсан ч санал зөрөлдөх, муудалцах зүйл гарах болсон нь тэд хоёулаа 70-аад оны гоо сайхан, стиль имижийн бэлгэ тэмдэг байсантай холбоотой болов уу. Тэд маш олон шүтэн бишрэгчтэй. Зарим нэг нь хэтэрхий "шаргуу" байсан нь гэр бүлийнх нь амьдралд нөлөөлсөн байх. Охид бүсгүйчүүдийн зүрхийг бишрүүлж байсны хувьд Абдулов заримдаа хоромхон зуурын зугаа цэнгэлд орооцолдчихдог байжээ. Киноныхон нэг хэсэг "Шадар гурван цэрэг" киноны зураг авалтын үеэр Ирина Михаил Боярскийтай дотно харилцаатай байсан хэмээн шуугиж байлаа. Харин дараа нь бүх Москва даяар Алферова дуучин Александр Серовтай янаг амрагийн холбоотой болсон талаар шуугиж эхлэв. Энэ ярианд тос нэмсэн зүйл нь Ирина дуучны хоёр ч клипт тоглосон явдал юм.

-Ирина бид хоёрын харилцаа их дотно байсан нь ийм яриа гарахад хүргэсэн байх хэмээн саяхны нэгэн ярилцлагадаа Александр Серов дурссан.
Тохиолдлын зүйл үү, эсвэл тэдний хооронд үнэхээр ямар нэгэн юм болсон уу, Серовын клип зурагтаар цацагдаж эхлэх үед Абдулов, Алферова нар гэр бүлээ цуцлуулах шийдвэр гаргалаа. Одод хэн хэнийхээ явдлыг уучилж чадалгүй салцгаалаа гэж зарим нь ярьж байв. Абдулов байраа эхнэр, хүүхдэдээ үлдээжээ.

Ирина, Александр нар тэнгэрт мандсан хоёр нар шиг л байсан. Магадгүй тэнд тэдэнд давчуу санагдсан уу?
Юм хумаа аваад явахдаа Александр Гаврилович дахин гэрлэхгүй гэж хэлж байжээ. Алферова өнгөрөгч зун хүртэл түүний албан ёсны эхнэр байжээ. Абдулов "Хавх" киноны зураг авалтын үеэр Иринагаас гэрлэлтээ албан ёсоор цуцлуулах санал тавьжээ. Тэрбээр Юлия Милославскаятай гэрлэхээр шийдсэн нь тэр байж. Алферова, Абдулов нар найз нөхдийн харилцаагаа хадгалж үлдсэн ч "Хавх" кинонд хамтарч тоглох үеэр санал зөрөлдөх зүйл олон гарч байжээ. Зургийн багийнхны яриагаар тэр үед Абдуловын бие тааруу байж. Тэрбээр заримдаа дүрийнхээ текстийг мартчихна. Биеийн байдал нь ямар байгааг тухайн үед  мэдээгүй байсан Ирина түүнийг их зэмлэнэ. Заримдаа Александр Гаврилович өөрөө тэсвэр алдан, хүмүүс рүү уурлачихдаг байв. Харин дараа нь бие муу байгаагаа хэлж, уучлалт гуйдаг байжээ. Ерөнхийдөө Ирина, Александр хоёр сайхан харилцаатай байдаг бөгөөд үргэлж холбоотой байдаг гэнэ. Тэд Абдулов, Юлия Милославская хоёрын хүүхдийн төрсөн өдрийг гэр бүлээрээ тэмдэглэсэн байна. Ирина хуучин нөхрөө сайн бүсгүйтэй учирсанд үнэхээр баярлаж байгаа аж.

Одоогийн нөхөр
Одоогийн нөхөр жүжигчин Сергеем Мартыновтай  Алферова "Шерифын од" киноны зураг авалтын үеэр танилцжээ. Гэхдээ зарим нь тэдний харилцаа Иринаг Абдуловтай сууж байх үед эхэлсэн ч гэж ярьдаг. Ирина Мартынов удаан хугацааны турш түүний анхаарлыг татах гэж хичээж байсныг нуудаггүй. Сергей алдарт жүжигчний сэтгэлийг өвөрмөц аргаар татсан гэдэг. Тэрбээр хайртай бүсгүйнхээ хөргийг зурж ханандаа өлгөжээ. Тэрхүү зураг одоо ч тэдний гэрт өлгөөстэй байдаг. Тэдний дурлал олон шалгуурыг давж гарсан гэдэг. Ирина "Ленком" театрт томоохон дүрд тоглох гээд чадсангүй. Өөрийг нь үнэлэхгүй байгаа нь түүнийг залхаажээ. Тэрбээр тэндээс гарч, орчин үеийн дуурийн театрт оров. Тэндээ өнөөг хүртэл ажиллаж байна. Театрын цалингаас өөр орлого жүжигчин бүсгүйд байсангүй. Олон ангит "Хавх" кинонд тоглосноос хойш дахин зураг авалтад оролцсонгүй.

Тэрбээр хөгшрөөд ядуу тарчиг амьдрахаас айдаг гэнэ. Энэ нь ч оргүй зүйл биш юм. Түүний нөхөр кинонд тоглох нь багассан тул бизнест хүч үзэхээр шийджээ. Одоогоор хангалттай  мөнгө олоогүй л байна. Нэгэн үе Иринаг мөнгөгүйдлээс Абдулов авардаг байв. Тэрбээр өөрийн киноны гол дүрийг түүнд өгч тоглуулна.

Мэдээж ийм сайхан бүсгүй гоё сайхан зүйл эдэлж хэрэглэж чадахгүй байна гэдэг нь харамсалтай ч Ирина Алферова үүндээ огтхон ч гутардаггүй. Одоо тэрбээр нөхрийн хамт дөрвөн хүүхдээ хүмүүжүүлж байна. Төрсөн охин Ксюшагаас гадна Мартыновын хоёр хүүхдийн эх болоод байгаа билээ. Саяхан түүний төрсөн эгч өөд болж, ганц хүү нь өнчирч үлдсэнийг Ирина мөн л өөр дээрээ авч өсгөж байна.