Тэд энэ сарын эхээр Британи, Энэтхэг гээд хоёр газар хуримаа хийжээ. Үүнээс ч өөр арга байсангүй. Холливудын од, загвар өмсөгч Элизабет Херли Англид төрж өссөн, католик шашинтай хүний хувьд өвөг дээдсийнхээ уламжлалыг даган эхлээд Британид хуримаа хийсэн аж. Эхнэр хүний хувьд бас эр нөхрийнхөө эх орных нь зан заншлыг ч хүндэтгэн дагах ёстой.

Хэдэн тэрбумаар тоологдох хөрөнгөтэй шинэ нөхөр нь төрсөн нутагтаа эхнэрээ авч очоод, Энэтхэг ёс заншлынхаа дагуу дахин хуримлажээ. Энэ удаа Элизабет Херли Энэтхэг хувцсаар гоёж, сари ороон,  хуримын ёслолоо  хийж, заан унан гудамжаар явжээ. Энэтхэгийн тэрбумтан, нэхмэлийн үйлдвэрлэлийн өв залгамжлагч, компьютерийн сүлжээний компанийн захирал Арун Наяр ийнхүү хоёр дахь удаагаа тив алгасч, Европын орны хүүхэнтэй гэрлэжээ.

Одоогоос дөрвөн жилийн өмнө хуучин Итали эхнэр нь түүнийг Элизабет Херлитэй танилцуулсан гэдэг. Италийн нэртэй загвар өмсөгчдийн нэг Валентина Педрони тухайн үед сэтгэл санааны хувьд хүнд байдалд ороод байсан Элизабетийг гэртээ урьж зочлон, түүнийг Венец, Ром зэрэг хотуудаар аялахад нь тусласан аж. Харамсалтай нь, найз нь удалгүй эр нөхөртэй нь зугаалах болжээ.

Арун Наяр ч Холливудын одод сэтгэл алдарсанаа зөвшөөрөөд зогссонгүй, Валентина Педронид салах хүсэлт тавьсан байна. Хүүхэн хоёр жил хэртэй гэрлэлтээ цуцлуулах зөвшөөрөл өгөлгүй явснаа өнгөрсөн онд Арун Наяраас салахаар шийдсэнээ албан ёсоор нийтэд мэдээлжээ. Арун Наяр 1,17  сая доллар хуучин эхнэртээ өгч гэрлэлтээ цуцлуулаад Элизабет Херлитэй хуримаа хийсэн аж. Харин тэдний хуримын үеэр Британи, Америк, Энэтхэг, Итали болон бусад орны сонин хэвлэлүүдэд сүйт бүсгүйн амьдралын талаар олон янзын мэдээлэл гарч байлаа.

“Хэрэв зорьж байгаа л бол замаасаа бүү буц” гэж Элизабет Херли хэлэх дуртай. Түүний бага насны амьдрал аз жаргалтай байжээ. Тэрбээр аавынхаа үгнээс гардаггүй мөртлөө яагаад ч юм бэ ээжийнхээ хэлсэн бүгдийг эсэргүүцдэг охин байсан гэдэг. Лизийн энэ занг аав нь шүүмжилж, түүнийг “дуулгавартай сайн охин” болгохыг хичээсэн боловч бүтсэнгүй. Лиз амьдралаа өөрийнхөө санаанд нийцүүлэн зохиожээ. Холливудын дуулиант эрчүүдийн нэг Хью Гранттай 13 жилийн турш албан ёсоор гэрлэлгүй хамтран амьдарсан хэдий ч цаадах нь биеэ үнэлэгч хүүхэнтэй байнга зугаалдаг болсныг мэдсэн  даруйдаа холбоогоо тасалж орхисон аж. Харин түүнийг жүжигчин болж алдаршихад Хью Грант онцгой нөлөөлсөн гэдэг.

Элизабет Херли ээж, аавынхаа хүслээр бүжигчин болохгүйн тулд чадлаараа тэмцжээ. Юуны өмнө жингээ нэмэхийн тулд хоолны дэглэм сахихаа больж, дараа нь үсээ ягаан өнгөөр будуулж, хамраа нүхлэн ээмэг зүүжээ. Чихээ ч цоолж, биедээ 12 нүх гаргав. Ийм этгээд араншин балетын багшийнх нь дургүйг хүргэсэн нь мэдээж. Ингээд эцэг эхэд нь охиноо балетын сургуулиас гаргах санал тавихад Элизабет баярласандаа хөл нь газар хүрэхгүй байлаа.

Үүнээс хойш удалгүй тэрбээр Лондоны төв студийн коллежид суралцаж, төдөлгүй театрын жүжигчин болсон гэдэг. “Зорчигч ¹ 57”, “Остин Пауэрс”, “Цэнхэр нүдэн Микки “зэрэг хэд хэдэн кинонд Хью Гранттай цуг тоглосон нь түүнийг алдаршуулав.  Элизабет Херли, Хью Грантаас холдоод нэг хэсэг продюсер Стивен Бингтой зугаалжээ. Энэ зугаалга Элизабетын хүүхэдтэй болсноор “дуусав”. Харин Стивен Бинг өөрийгөө “Хүүхдийн эцэг биш” гэж мэдэгджээ. Хэрэв Стивен Бинг хүүхдийн эцэг гэдгээ хүлээн зөвшөөрсөн бол Калифорнийн хуулийн дагуу 75О сая гаруй долларын хөрөнгө Элизабет Херлид өгөх ёстой байсан юм. Гэвч хүүхний бардам зан нь хөдлөн, залуу хархүүгээс дэмжлэг авахгүй гэж мэдэгдэв. Энэ үед Хью Грант, Элизабет Херлиг эргэж тойрч, хүүхдээ төрүүлтэл дэргэд нь байсан гэдэг.
Элизабет Херли одоо 42 настай. Усны хувцасны үйлдвэрлэлд хөрөнгө оруулалт хийж, рекламанд байнга тоглож, мөнгө олдог. Саяхан наран шарлагын хувцасны хувийн үйлдвэртэй болжээ. Нэг удаа түүнээс сонин сурвалжлагч “Таныг Арун Наяртай суух боллоо гэж сонслоо. Хью Грантыг түргэн мартаж чаджээ” хэмээн асуужээ. Элизабет Херли “Хүмүүс бие биеэ мартахын тулд салдаг. Харин хүүхнүүд хайрлан дурлаж, цөхөрч гомдож, тэрнээсээ цэнгэл баясал олж авахын тулд дахиад л хэн нэгэнтэй учирдаг. Алдсан ч бай хамаагүй, би ийм л амьдралд дуртай” гэж хариулсан гэдэг.
Гуравдугаар сарын эхээр болсон тансаг хуримын үеэр Элизабет Херли Энэтхэг нөхөр Арун Наярынхаа гараас чанга атган инээмсэглэн зогсож байлаа. Тэр үнэхээр аз жаргалаа олсон ч байж болох юм.

Эх сурвалж: Ням гариг