ДЕБОРА хөлбөмбөгчдийг сонгодог
Италийн загвар өмсөгч бүсгүй Дебора Сальвалажо жил гаруй амрагийн холбоотой байсан “Рома” багийн хамгаалагч Маттео Ферраригаас салаад нэг их удаан гунигласангүй. Хэвлэл мэдээллийн хэрэгслүүд тэдний ирээдүйн хуримын тухай уралдан бичиж, бэх нь ч хатаж амжаагүй байтал “тогтворгүй” Феррари сүйт бүсгүйгээ Венесуэлийн супермодель Аида Йеспикагаар сольчихов.
Дебора хариуд нь “Сампдори” багийн хамгаалагч Петер Аккардитай зугаалах болжээ. Тэр хоёр шөнийн цэнгээний газраар хамтдаа зочилж, сартай шөнөөр далайн эргээр зугаалсан нь паппарацийнхны дуранд буугаад амжжээ.
Эцэст нь хэлэхэд Сальвалажо өөрөө спорттой холбоотой байдаг тул хөлбөмбөгчдийг сонирхдог нь тохиолдлын зүйл биш аж. Түүний эцэг хөлбөмбөгийн шүүгч байсан ба Дебора өөрөө кикбокс сонирхож, хөлбөмбөг үзэх дуртай ажээ.

БЕЛИНДА аймшигтай хартай
“Фулхэм” багийн ерөнхий дасгалжуулагч Крис Коулмэны эхнэр Белинда нөхрөө үнэнч бус хэмээж үнэн мөнийг олохоор шийджээ.
Тэрбээр 2000 фунтстерлингээр  сонсох төхөөрөмж худалдаж аваад автомашинд нь байрлуулсан аж.
Дөрвөн хүүхдийн эх Белинда нөхрөө араар нь тавьж байгаа болов уу гэж бодох бүртээ галзуурах шахдаг. Сүүлийн үед түүнд эр нөхөр нь хоёр ч хүүхэнтэй явалдаад байгаа гэсэн таамаг төржээ. Тиймээс Белинда нөхрөө багтайгаа өөр хот руу тоглолтоор явсан үеийг ашиглаж энэ талын мэргэжилтнүүдэд хандан Range Rover машинд нь зөвхөн хүний яриа сонсоод зогсохгүй, мөн утасны яриаг нь ч хянах боломжтой төхөөрөмж суурилуулсан байна.
“Сайн санаат” сэтгүүлчид энэ тухай Коулмэнд хэлэхэд тэрбээр хэр удаан үргэлжилж байгааг асуугаад, тэр дороо машинаа танилдаа бэлэглэжээ.

РАЙАННА Бейонсийн өрсөлдөгч
АНУ, Английн хит дууны жагсаалтад нэлээд дээгүүр байр эзэлдэг, Барабдосын дуучин бүсгүй Райанна NBA-гийн “Нью Жерси Нетс” клубийн эзэн,  рэп дуучин Жей Зитэй холбоотой гэнэ. Нөхцөл байдал энгийн гэвэл бас тийм биш ажээ. Учир нь Жей Зи удаан хугацааны турш нэлээд алдартай дуучин, жүжигчин бүсгүй Бейонстой дотно харилцаатай байгаа билээ. Олон сонин сэтгүүлд Райанна, Жей Зи нарын хооронд хамтын ажиллагаанаас үүдэлтэй дотно харилцаа үүсээд байгаа гэсэн мэдээлэл нийтлэгдээд байгаа аж.

Райанна сэтгүүлч, сурвалжлагчдын асуултыг итгэлгүйхэн няцааж байгаа гэнэ. “Надаас Жей Зи-гийн талаар асуухад миний инээд хүрдэг байсан бол одоо зүгээр л үгүйсгэдэг. Хэрэв хүмүүс энэ талаар ярихыг хүсч байгаа бол би тэднийг болиулж чадахгүй шүү дээ” хэмээн ярьсан байна.

Эх сурвалж: Ням гариг