МАСЗХ гэх нэгэн туган дор хувьсгалт намын залуусыг нэгтгэн шинэ цагийн коммунистуудыг бэлтгэн нийлүүлдэг байсан УИХ-ын гишүүн асан У.Хүрэлсүхийн үе бүрмөсөн дуусгавар болсныг У.Барсболд зарлан тунхаглалаа. Нэгэн цагт МАСЗХ гэх байгууллагын лидер явсан энэ хоёр залуугийн зөрчил дээд цэгтээ хүрснээс У.Барсболд нь 2004 оны сонгуулийн өмнөхөн нам дотроо “Улаан сарнай” гэх залуучуудын хөдөлгөөнийг байгуулснаа зарлан МАСЗХ-ноос өөрийнхөө дэмжигчдийн хамт өрх тусгаарлан гарч байсан. Хоёр залуу лидерийнхийнхээ ашиг сонирхлын зөрчилдөөнөөс болж намынхаа залуусыг хоёр хуваахаас болгоомжилсон МАХН-ын дарга Н.Энхбаяр У.Барсболдыг Засгийн газрынхаа кабинетад оруулж, Байгаль орчны сайдын суудалд суулгаснаар арайхийн намжиж байсан билээ. Ер нь У.Барсболд Ерөнхийлөгч Н.Энхбаярын талыг тууштай дэмжигч нэгэн бөгөөд энэ ч утгаараа С.Баярыг МАХН-ын даргаар томилогдоход Н.Энхбаярын нөлөөг хадгалахаар дээрээс “томилогдсон шийдвэртэй”-гээр намынхаа нарийн бичгийн даргаар сонгогдон Удирдах зөвлөлийн гишүүн болсон хүн. Үүнийхээ хэргийг тэрбээр сая Орон нутгийн сонгуульд нэр дэвшүүлэх үеэр гаргаж МАХН дахь анхан шатны нэгжид нэр нөлөөгөө бэхжүүлж чадсанаа баталлаа. Орон нутгийн сонгуулиар МАХН залуучуудаа түлхүү гаргаж байгаа бөгөөд “У.Барсболд ахынхаа буянаар сонгуульд хүч үзэхээр томилогдсон залуус ёстой л хөрөнгө хогшлоороо уралдаж эхлээд байна”. У.Барсболдын хувьд уг нь тийм ч бүтэлтэй нэгэн биш бөгөөд Ерөнхийлөгч “ахынхаа буянаар” Байгаль орчны сайдаар хэдэн жил ажиллахдаа “ногоон хэрэм” хөтөлбөрийг хэрэгжүүлнэ гэдэг нэрийн доор модны бизнесийг жинхэнэ утгаар нь цэцэглүүлсэн нэгэн. Тэр ч бүү хэл тусгай хамгаалалттай газар нутгийг өндөр үнээр худалдах эх суурийг тавьж багагүй хөрөнгөжсөн түүний балгаар салбарынх нь хоёр ч газрын дарга аавын хаалга татах дөхөж тухайн үедээ багагүй дуулиан тарьж байсан удаатай. Ийнхүү хэрэг мандаачихаад гадаадад хэсэгтээ байж бүгж байгаад ирсэн тэрбээр сүүлийн үед хүчээ авч У .Хүрэлсүхийн тэргүүлж байсан МАСЗХ-ны залуучуудыг Хадгаламж банкны хэргээр тарааж, өөрийн бүлэглэлийг суурин дээр нь мандуулснаа ил тод зарлан тунхаглах боллоо. Үнэндээ ч У.Барсболдын бүлэглэлийн буюу залуучуудын фракциас НИТХ-д арав гаруй залуу нэр дэвшиж буйг эх сурвалжууд баталж байгаа бөгөөд тэрбээр хөшигний ардаас чамгүй хор найруулж суугаа нь бусад нэр дэвшигчдийн хуввд томоохон асуудал болоод буй гэнэ. Мөн шинэ Засгийн газрын дэд сайдуудад Хувьсгалт намаас томилогдох хүмүүсийн нэрсийн жагсаалтад МАСЗХ-ны хэд хэдэн залуусын нэр байгаа нь мөн л У.Барсболдын хүмүүс байна гэдгийг улстөрчид аль хэдийнэ анзаарчээ.

Эх сурвалж: Монголын мэдээ