Алаагүй баавгайн арьсыг хуваах гэсэн нэр томъёо улстөрд ороод олон оныг үдлээ. Ер нь монголчууд алаагүй баавгайн арьсыг хувааж мөрөөддөг нь гэм биш зан. Чухам үүнийг л эрх мэдэлтнүүд овжноор ашигладаг юм. Сүүлийн үед ард түмний дунд ирэх сонгуулиар АН ялна гэсэн цуу яриа дэгдэх болсон. Үүнд зарим нэгэн албан тушаалд дуртай хийрхэгчид бүрэн дүүрэн итгэсэн бөгөөд түүн дээр нь зарим хүмүүс тоглолт зохиож байна. Тухайлбал, АН-ын Бодлого, зохицуулалтын дарга нэрт “Алтан гадас”-ч Н.Алтанхуяг өөрийгөө Ерөнхий сайд болно хэмээн намынхандаа итгүүлэх болжээ. Тэр ч бүү хэл Үндэсний зөвлөлдөх хорооны гишүүдийг ойрын үед нэг бүрчлэн дуудаж уулзан хөдөө орон нутагт байгаад нь утас цохин албан тушаал амлах болсон байна. Тэрбээр өөртэйгээ өрсөлдөх хүнийг “Фортуна” Н.Батбаяр хэмээн үзэж байгаагаа ч зарим нэгэнд нь илэн далангүй ярьсан байна лээ. Энэ хоёр уг нь “Алтан гадас”-т багтаж хор найруулалцдаг хоёр. Харамсалтай нь хэн хэнийх нь бодолд Ерөнхий сайд болох дон шүглэсэн учраас өөдөөсөө харж инээлдэн, буруу харж архиралдаж байгаа гэнэ. Ер нь Н.Алтанхуяг мэтийн хүмүүсээр Ерөнхий сайд тавина гэвэл улс орон нэгмөсөн уруугаа харахын дохио. Ашигт малтмалын томоохон орд газруудыг Тогтвортой байдлын гэрээ нэрийн дор гадныханд үнэ төлбөргүй өгсөн бичиг баримтад Н.Алтанхуягийн гарын үсэг хэдэнтээ дурайж байдаг юм билээ. Ийм хүн хэзээ нэгэн өдөр тамга баривал Монгол улсыг ч Тогтвортой байдлын гэрээ нэрээр өгөхөөсөө ч сийхгүй нь тодорхой.